Caasimada Online
December 13, 2012 at 1:30 am

XOG-WARRAN: Xasan Dahir oo ka bad baaday 5 isku day dil iyo wax yaab leh oo ka socda Baraawe + Xog kale

Waxaa daabacay Alaxmed

Dadka qaraabada la ah iyo saaxiibada hoggaamiyaha Xisbul Islaam Sheekh Xasan Daahir Aweys ayaa sheegaya in uu dhufays ka dhigtay Baraawe, ayna ku hareeraysan yihiin dad isaga la jira oo qabiilkiisa ah, kaddib markii uu ka badbaaday dhawr shirqool oo isku day dil ah.

Imaan Nuur oo 22 jir ah Awaysna la jaal ah, ayaa sheegay in hoggaamiyuhu uu ugu yaraan ka badbaaday illaa shan isku day dil ah labadii usbuuc ee la soo dhaafay, taas oo ku kaliftay inuu qabiilkiisa gabbaad waydiisto. Nuur ayaa sheegay in dad ka tirsan al-Shabaab ay isku dayayaan inay ka hor istaagaan hoggaamiyayaasha aan xag-jirka ahayn sida Aweys oo kale in ay wada hadal nabadeed la galaan dawladda cusub.

Isku daygii ugu dambeeyay wuxuu dhacay Nofeembar 28-keedii markii dagaal yahaniinta al-Shabaab ay ku bartilmaansadeen gaadhiga Aweys qalabka waxyaabaha qarxa ah oo meelaha fog laga hago isaga oo socday waddada wayn ee Baraawe, oo 170 kiiloomitir koonfurta kaga aadan Muqdisho.

Qof gaadhiga ku jiray oo waxyeelo soo gaadhay ma jirto, laakiin firirkii bambada ayaa waxyeelo gaadhsiiyay gaadhiga, sida uu sheegay Maxamed Cusmaan Caruus, oo ah dagaalyahan hore oo al-Shabaab ah, qaraabana la ah Aweys.

Xisbul Islaam ayaa ka baxay al-Shabaab bishii Sebteembar, iyaga oo sheegtay kala duwanaan xagga fikradaha ah iyo isbaddalada siyaasadeed ee ka dhacay Soomaaliya.

Sagal Khalif Cabdi oo Baraawe dagan, 49 jirna ah, ayaa sheegtay in awood isku sheegashada ka dhaxaysa al-Shabaab kuwa la jaalka ah iyo kuwii ka tagay kooxdan al-Qaeda la bahawday ay abuurayso dagaanaansho la’aan iyo dhiig badan oo qubta.

Xasan oo ku dhex jira Madaxda Shabaab.

Xasan oo ku dhex jira Madaxda Shabaab.

Waxay sheegtay in dagaal yahaniinta la xidhiidha hoggaamiyaha al-Shabaab Axmed Cabdi Godane, oo loo yaqaano Mukhtar Abuu Zubayr, ay ku soo rogeen xakamayn adag meelaha waqooyiga iyo koonfurta ah ee magaalada Baraawe laga galo.

“Mid ka mid ah la taliyayaasha Sheekh Xasan Daahir Aweys ayaa Muqdisho aaday, si uu ugu booriyo duqayda qabaailka in ay dhexdhexaadiyaan, wada xidhiidhna ay u sameeyaan Aweys iyo Madaxwaynaha Soomaaliya Xasan Sheekh Maxamuud,” Cabdi ayaa sidaas yiri.

Tani waxay timid kaddib markii dhawr jeer uu dagaal iyo khilaaf xooggani dhex maray labadii markii hore jaallaha ahaa ee Aweys iyo Godane, Cabdi oo ay isku qabiil yihiin Aweys ayaa sidaas yiri.

Wiiqitaanka al-Shaabab

Falanqeeyaha dhinaca siyaasadda Barkhadle Jibriil Cilmi ayaa sheegay in Aweys uu xoojiyay difaaca qabiilkiisa tallaabooyin cadna uu ka qaatay difaaca naftiisa iyo qoyskiisaba haddii ay dhacdo in gurigiisa lagu soo weeraro.

Cilmi ayaa shaaca ka qaaday in al-Shabaab ay isku dayayso in ay khaarijiso hoggaamiyayaasha Xisbul Islaam, sababta oo ah waxay doonayaan in ay wada hadal la galaan dawladda waxayna dideen in ay qaataan kooxda dagaal yahaniinta ah fikradooda burburineed iyo ficiladooda argagixiso.

Wuxuu sheegay inay tahay in ciidamada Soomaaliya iyo kuwa Ergada Midawga Afrika ee Soomaaliya ay ka faaiidaystaan xaaladda sii xumaanaysa ee burbur ee kooxdan dagaalyahaniinta ah ayna u talaabsadaan dhinaca Marka iyo Baraawe si ay dadka u ilaaliyaan ayna u taageeraan dadaallada nabadda iyo maamullada maxalliga ah.

Nasra Cusmaan Jiiti, oo wariye hore ahayd, ayaa sheegtay in wada hadallada Xisbul Islaam iyo dawladda Soomaaliya ay yarayn doonto awoodda al-Shabaab.

Waxay sheegtay in kooxdan ay ugu danbayntii dhici doonto, sababta oo ah waxay dishay dad aan waxba galabsanin, ku ciyaartayna khayraadkoodii. Dagaal yahaniinta kooxdan ayaa qorigooda u isticmaalay qof kasta oo ka soo horjeesta habkooda mayalka adag si ay u aamusiiyaan in laga horyimaado, ayay tiri.

“Ma garanayno waxa dhici doona, laakiin qof walba wuxuu ka fikirayaa in ay dhici karto isku dhac la mid ah kii dhacay Luuliyo 2010 kaas oo ka dhex dhacay al-Shabaab iyo Xisbul Islaam iyaga oo ku dagaallamay khayraadka dhaqaalaha ee ka imaanayay dekadda iyo garoonka magaalada Kismaayo, caasimadda gobalka Jubada Hoose,” ayay tiri.

Yasmin Salad Gaagaale, oo ah dhaqdhaqaaqe ka tirsan Isutaga Ururka Rayadka Soomaaliya, ayaa sheegtay in bilawga wada hadal siyaasadeed oo lala galo kuwa aan xag jirka ahayn ee al-Shabaab ay sii wiiqi doonto kooxdan waddadana u xaadhi doonto hawlgallo milatari ee laga fuliyo qaybo ka tirsan badhtamaha iyo koonfurta Soomaaliya.

Tani waxay kaalmaynaysaa fulinta qorshayaashii ammaanka ee ujeedadoodu ay ahayd jabinta al-Shabaab iyo kuwa nabad diidka ah, ayay tiri, iyada oo intaas ku dartay in hawlgallada milatarigu uu u saamixi doono ciidamada xooga Soomaaliya in ay raadsadaan dagaal yahniinta ayna ka mamnuucaan in ay ka baxsadaan kana warwareegaystaan ganaaxa dambiyadii xumaa ee ay galeen.

“Dambiilayaasha argagixisada iyo kuwa iyaga la jaalka ah oo gaystay dambiyo ka dhan ah shacabka Soomaaliya waa in la qabtaa,” Gaagaale ayaa sidaas yiri. “Dadkaasi waa kuwii dilay, madaxa ka gooyay, gacmaha, lugaha iyo carabkaba ka jaray dadka sabab la’aan. Kumanaan qof ayaa ka markhaati kici doona dambiyadooda, kuwaas oo ay ku jiraan kuwii ka badbaaday weerarradoodii is qarxinta iyo baadhitaankooda xaafadaha la dagan yahay.”

Gaagaale ayaa sheegtay in qorshaha barnaamijka wada heshiisiinta qaranka, oo uu hadafkiisu yahay in dib loo abuuro daganaansho dawladduna ay waddanka oo dhan gacanta ku dhigto, ay tahay in uu ogolaado kuwa nabada taageera in ay ka baxsadaan gacanta xag-jirayaasha.

Isha: Sabahi Online

Related Posts